CIG-Saúde asina un acordo retributivo e a regulación do descanso compensatorio da garda do venres para o persoal residente

Hoxe, 30 de Outubro, sae publicado no DOG: ORDE do 28 de outubro de 2026 pola que se publica o Acordo do Consello da Xunta de Galicia, do 26 de outubro de 2026, polo que se aproban as medidas relativas a xornadas e descansos e persoal MIR no ámbito do Servizo Galego de Saúde.

Na Mesa Sectorial celebrada o 19 de outubro de 2026, CIG-Saúde asinou un acordo que recolle melloras retributivas para o persoal residente e regula o descanso compensatorio das gardas realizadas os venres.

ACORDO RETRIBUTIVO

Complemento de residencia

Con efectos do 1 de xaneiro de 2027, establécese un complemento de residencia coas seguintes contías:

Persoal residente A1:

• Desde o 1 de xaneiro de 2027: 75 €/mes.
• Desde o 1 de xaneiro de 2028: 100 €/mes.
• Desde o 1 de xaneiro de 2029: 120 €/mes.

Persoal residente A2:

• Desde o 1 de xaneiro de 2027: 56,25 €/mes.
• Desde o 1 de xaneiro de 2028: 75 €/mes.
• Desde o 1 de xaneiro de 2029: 90 €/mes.

Retribución da quinta garda e sucesivas

Con efectos do 1 de xuño de 2026, establécense as seguintes contías para a quinta garda e sucesivas do persoal residente A1:

• Persoal residente de 1.º ano: 21,21 €/hora.
• Persoal residente de 2.º ano: 24,27 €/hora.
• Persoal residente de 3.º ano: 27,35 €/hora.
• Persoal residente de 4.º e 5.º ano: 30,26 €/hora.

Só se poderán realizar máis de cinco gardas ao mes por necesidades formativas.

DESCANSO COMPENSATORIO DA GARDA DO VENRES

O acordo regula tamén o descanso compensatorio correspondente ás gardas realizadas os venres, con efectos desde o 4 de setembro de 2026.

Con carácter xeral, este descanso desfrutarase nos 15 días seguintes á realización da garda, preferentemente o primeiro día hábil.

Excepcionalmente, por razóns formativas, poderá desfrutarse noutra data, sempre que exista acordo entre a persoa traballadora e a xerencia.