CIG-Saúde DENUNCIA UN RETROCESO NA PROFESIÓN ENFERMEIRA
O SERGAS pretende desmantelar a atención integral coa creación de prazas de “enfermeira/o a domicilio”
- AgEnfermeira
- Mesa Sectorial
- Sanidade Pública
Un paso atrás na Atención Primaria
Desde CIG-Saúde denunciamos que o SERGAS quere implantar un modelo de enfermaría a domicilio, separado da Atención Primaria, que supón un retroceso histórico para a nosa profesión.
As enfermeiras e enfermeiros de Atención Primaria prestamos unha atención integral á persoa, non só realizamos actividades illadas. Cada actuación —unha cura, unha extracción, un control— forma parte dunha avaliación global, con diagnósticos enfermeiros e unha planificación dos coidados que teñen en conta o contexto, a familia e o entorno da persoa.
A nosa profesión é de coidados, non de tarefas
A enfermaría non é unha profesión técnica nin fragmentada. Disociar as actividades dos coidados é deshumanizar a atención e degradar o noso papel profesional.
O modelo que propón o SERGAS lévanos de volta ao pasado: a unha enfermeira por actividade, sen continuidade asistencial e sen visión integral da persoa.
Isto non é o que queremos as enfermeiras e enfermeiros galegos.
As prazas deben fortalecer a Atención Familiar e Comunitaria
As 77 prazas de ESAD que fan atención domiciliaria deben integrarse nos servizos e unidades de Atención Primaria como enfermeiras/os de Atención Familiar e Comunitaria, reforzando o modelo actual e reducindo os cupos excesivos que impiden unha atención domiciliaria de calidade.
Se hoxe non se pode atender ben no domicilio non é por falta de perfís diferenciados, senón porque os cupos son inasumibles e os recursos insuficientes.
Queremos avanzar, non retroceder
CIG-Saúde esixe que o SERGAS:
- Progrese no desenvolvemento real do Plan de Atención Primaria,
- Identifique as necesidades do sistema,
- E faga a cobertura necesaria con profesionais cualificados.
Por unha enfermaría con dignidade e respecto
Non queremos inventos nin experimentos coa nosa profesión.
Queremos estabilidade, dignidade e respecto.
Queremos progresar, non volver atrás.
O modelo proposto afonda na perda de calidade asistencial e evidencia un novo paso cara ao desmantelamento da Atención Primaria.
As enfermeiras e enfermeiros galegos esiximos respecto e avance profesional.
CIG-SAÚDE – A forza das persoas que loitan pola sanidade pública!
