Mesa sectorial do 7 de novembro 2024
- Mesa Sectorial
- Oposicións
- Sanidade Pública
Concurso de traslados aberto e permanente
O SERGAS informa que na semana do 18 de novembro publicarase a resolución definitiva do CTAP do ano 2024.
A partir da data de publicación no DOG iniciaranse as tomas de posesión de tódalas categorías, excepto algunhas categorías de FEAs onde a súa incorporación se poderá adiar ata a toma de posesión dos procesos de estabilización
no 2025.
Os efectos administrativos do CTAP de tódalas categorías serán de 2024.
Dotación de prazas no SERGAS para o ano 2025
O SERGAS entrega un cadro coas prazas de nova creación que incluíron no borrador de orzamentos do SERGAS para o vindeiro ano, que como xa é habitual, sen negociación na mesa sectorial.
CIG-Saúde esixe que se negocien no seo da Mesa Sectorial os incrementos de prazas, e os criterios obxectivos que se terán en conta á hora de determinar estas necesidades.
O número de prazas que nos presenta o SERGAS está claramente por debaixo das necesidades de persoal existente.
No caso dos/as dietistas-nutricionistas o SERGAS confirma que a creación de prazas desta categoría vai ser de 45 profesionais, isto supón unha perda de mais da metade dos/as profesionais que están a realizar este traballo a día de hoxe.
Informan que no caso dos/as dietistas-nutricionistas, o persoal contratado actualmente prorrogará o vínculo actual ata o 28 de febreiro. A partir desa data ofertaranse pola lista de contratacións as 45 interinidades creadas para o ano 2025.
O SERGAS non aclara cales son os centros onde vai retirar esta prestación sanitaria que se está dando, CIG-Saúde esiximos que previo á oferta destas 45 interinidades se nos informe para que centros/áreas sanitarias van ir as prazas e en base a que criterios se fixo esta reestruturación da asistencia.
Ademais desde CIG-Saúde seguiremos defendendo que é unha categoría necesaria, que está a desenvolver unha labor moi importante e que a redución do número de profesionais vai levar consigo un empeoramento da prestación sanitaria.
O SERGAS informa que respecto ao persoal enfermeiro que está contratado para “asistencia domiciliaria” prorrogarán estes contratos un ano mais, pero sen previsión de creación de ningunha destas prazas.
O SERGAS emite unhas instrucións, de xeito unilateral, para a aplicación da redución de xornada de 2025 que empeora claramente o acordo do 20 de abril de 2023.
As instrucións OBRIGAN ao persoal facultativo de atención hospitalaria (FEA, médico/a de admisión, médico/a de HADO), ao médico de familia e pediatra de atención primaria e ao FEAP (na súa xornada ordinaria como médico/a de familia) a continuar realizando os sábados que tiñan nas carteleiras previo ao acordo do 20 de abril.
É dicir, na práctica, o SERGAS NON recoñece para este persoal a xornada de 35 horas.
Hai fórmulas para manter a prestación sanitaria sen que iso repercuta na xornada ordinaria que deben realizar os/as traballadores/as da sanidade pública.
O SERGAS volve deixar ao marxe da negociación da Mesa Sectorial, sobre a aplicación do Acordo do 20 de abril, ás entidades adscritas á Consellería (061, ADOS, ACIS, Galaria…).
Na Mesa Sectorial de hoxe, 7 de novembro de 2024, no relativo á instrución de aplicación de redución de xornada do acordo de 20 de abril o SERGAS NÉGASE a incluír ao persoal estatutario destas entidades.
O acordo de 20 de abril é claramente de aplicación a este persoal e, pese que as instrucións están relacionadas co desenvolvemento deste acordo, a
Dirección de RRHH do SERGAS négase a que figuren expresamente na
instrución.
CIG-Saúde seguirá defendendo que os/as profesionais que traballan nestas entidades teñen dereito a que se lles apliquen os acordos de Mesa Sectorial, e por iso, deben figurar de xeito expreso nestes para que non existan diferentes interpretacións na súa aplicación!!
